Bloq
Rəqəmsal Hədəfləmə
Hədəf auditoriyası PR-da və marketinqdə o qədər güclü faktordur ki, istənilən mövzu haqqında danışanda, ona toxunmalı olursan. Normal olaraq, biz də əvvəlki yazılarımızda tez-tez bu haqda fikirlərimizi vurğulamalı olduq.
Lakin indi danışacağımız auditoriya bir az fərqlidir. Rəqəmsal dünyanın öz qanunları var. Ona görə də bu dünya fərqli strategiyalar, yeni yanaşmalar tələb edir. Real həyatda hər hansı bir markanın (marka deyərkən, şəxsləri də buraya daxil edirik) hədəf auditoriyası bu kütləni meydana gətirən fərdlərin ortaq xüsusiyyətlərinə görə təyin edilir. Bu xüsusiyyətlər nə qədər çox olarsa, o qədər yaxşı…
Rəqəmsal dünyada isə həmin yanaşma öz gücünü itirir. Kontent dediyimiz o sehrli faktor burada da özünü prosesə daxil edir. Real dünya üçün hazırlanan strategiyalarda kontent həmişə hədəf auditoriyanın seçimindən sonra gəlirdi. Halbuki burada elə deyil. Necədir?
Rəqəmsal dünyada demək olar, hər mövzu üçün kontent yaradılıb. Hətta hər kəsdən gizlədiyiniz fikirlərinizi axtarsanız, onları da orda tapacaqsınız ?. Dəqiqləşdirsək, siz məhsul və ya xidmət, başqa sözlə, dəyər təklif edirsiniz və ona uyğun kontent yaradıb müxtəlif kanallar vasitəsilə öz auditoriyanıza çatdırırsınız. Lakin sizin dəyər təklifinizə oxşar kontent artıq xarici kommunikasiya kanallarında mövcuddur. İndi isə düşünün, sizin dəyər təklifinizə oxşar kontentləri oxuyan, izləyən insanlar sizin üçün potensial müştəri ola bilərmi? Yəni təklif etdiyiniz dəyərlər müəyyən edilibsə, hədəf auditoriyanızı onlara görə tapmaq mümkündürmü?
Düşünməyin ki, keçmişə, yəni əvvəl istehsal, sonra müştəri prinsipinə, qayıtdıq. Prinsip olaraq eyni yerdəyik, yenə də müştəri birincidir və dəyər təklifi ona əsaslanır, sadəcə onu tapma şəklimiz fərqlidir.
Misalla izah edək. Düşünün ki, hüquqşünassınız və ailə problemləri ilə bağlı məsələlərdə ixtisaslaşmısınız. Hədəf auditoriyası kimi ailə problemləri yaşayan, nisbətən orta və yüksək gəlirə sahib insanları görürsünüz və onlara çatmaq üçün çalışırsınız. Rəqəmsal dünyada isə hədəf auditoriyanızın kim olması haqqında düşünməyə ehtiyac qalmır: hazırda internetdə ailə məsələlərini tənzimləyən qaydalarla bağlı yaradılmış kontentləri oxuyan, araşdıran insanlar avtomatik olaraq sizin hədəfinizə çevrilir. Onlara çatmaq isə hazırkı SEO və SMM alətləri vasitəsilə olduqca asandır. Qısacası, hədəf auditoriyanızı axtarmadan, sadəcə xarici kontentlərə istinadən onlara çatmış olursunuz.
Başqa misal verək, bu daha ümumi olacaq. Yəqin ki, alacağınız telefona qərar verməzdən əvvəl modelləri müqayisə edən məşhur bloq videolarını siz də izləyirsiniz. Bu videolara baxdığınız anda telefon ticarəti ilə məşğul olan şəxslərin və ya şirkətlərin hədəfinə çevrilmiş olursunuz. Beləliklə, onların sizin kim olmağınız və sizi necə tapacaqları ilə bağlı qayğıları azalmış olur. Kontent özü hədəf auditoriyanın maraqlarını və yerini təyin edir.
Yəqin ki, zaman məsələsi də gözünüzdən qaçmadı. Real həyatda hədəf auditoriya bir proseslə təmsil olunsa da, burada artıq o anlıq bir faktordur. Yəni o, dəyər təklifinizə uyğun kontentə təmas etdikdə sizin üçün hədəfə çevrilmiş olur.
Görünür, fizikada olduğu kimi marketinqdə də zaman nisbidir və məkana bağlıdır ?. Başqa sözlə, rəqəmsal hədəfinizi 3 ölçü (3D) ilə təyin edə bilərsiniz. Bunlar kontent, zaman və məkandır.
Məkan deyərkən kanalınızın real və ya rəqəmsal, daxili və xarici olmasını nəzərdə tuturuq. İndiyə kimi xarici kommunikasiya kanallarında yerləşdirilmiş kontentlə bağlı danışdıq. Bunu rəqəmsal hədəfləmənin birinici mərhələsi də adlandırmaq olar. Daxili kommunikasiya kanalları isə hədəf auditoriyanı yenidən anlıq məsələdən prosesə çevirir. Növbəti yazılarda bu mövzu haqqında ətraflı danışacağıq.
© INPRESS PR Solutions
